ମସ୍ତିଷ୍କାଘାତ ହେବାର ୩ ଘଣ୍ଟା ମଧ୍ୟରେ ଡାକ୍ତରଖାନା ପହଞ୍ଚବି। ଆବଶ୍ୟକ: କିମ୍ସ ବିଶେଷଜ୍ଞ
ବିଶ୍ୱ ମସ୍ତିଷ୍କାଘାତ ଦିବସ
ଭୁବନେଶ୍ୱର,୨୯ା୧୦: ମସ୍ତିଷ୍କରେ ହଠାତ୍ ରକ୍ତ ପ୍ରବାହ ହ୍ରାସ ହେତୁ ଘଟୁଥିବା ସାଧାରଣ ସ୍ନାୟୁଗତ ରୋଗ ମଧ୍ୟରୁ ଗୋଟିଏ ହେଉଛି ମସ୍ତିଷ୍କାଘାତ (ବ୍ରେନ୍ ଷ୍ଟ୍ରୋକ୍) । ବ୍ରେନ୍ ଷ୍ଟ୍ରୋକ୍ ଏବେ ଏକ ଗମ୍ଭୀର ରୋଗ ଭାବେ ଉଭା ହୋଇଛି । ଏଥିରେ ଅନେକ ଲୋକ ପ୍ରାଣ ହରାଉଛନ୍ତି । ଭାରତରେ ଏହାର ହାର ଦିନକୁ ଦିନ ବଢ଼ିବାରେ ଲାଗିଛି । ବ୍ରେନ୍ ଷ୍ଟ୍ରୋକ୍ ହେଉଛି ମୃତ୍ୟୁର ଚତୁର୍ଥ ଏବଂ ଅକ୍ଷମତାର ଏକ ସାଧାରଣ କାରଣ । ଡାକ୍ତରୀ ତଥ୍ୟ ଅନୁସାରେ ପ୍ରତ୍ୟେକ ବର୍ଷ ଏକ ଲକ୍ଷ ଲୋକଙ୍କ ମଧ୍ୟରୁ ୧୦୦ରୁ୧୫୦ ଜଣ ମସ୍ତିଷ୍କାଘାତ ରୋଗର ଶିକାର ହେଉଛନ୍ତି । କେହି ବି କୌଣସି ସ୍ଥାନରେ ଏହାର ଶିକାର ହୋଇପାରନ୍ତି । ଉଚିତ୍ ସମୟରେ ଏହାର ଚିକିତ୍ସା କରା ନ ଗଲେ ଶାରୀରିକ ଏବଂ ମାନସିକ ବିକୃତି ହେବାର ସମ୍ଭାବନା ଥାଏ । ଷ୍ଟ୍ରୋକ୍ ଅବସ୍ଥାରେ ମଣିଷର ମୁହଁ ବଙ୍କା ହେବା ସହିତ, ହାତ-ଗୋଡ଼ କିମ୍ବା ଶରୀରର କୌଣସି ଅଙ୍ଗ ଅକ୍ଷମ ହୋଇଯିବା, ଜିଭ ଖନି ମାରିବା କିମ୍ବା ଠିକ୍ ଭାବେ କଥା କହି ନ ପାରିବା ଆଦି ଲକ୍ଷଣ ଦେଖାଯାଇଥାଏ । ଜଣେ ବ୍ୟକ୍ତି ଏହି ସବୁ ଲକ୍ଷଣ ଦେଖାଦେବାର କିଛି ସମୟ ମଧ୍ୟରେ ଷ୍ଟ୍ରୋକ୍ର ଶିକାର ହୋଇପାରନ୍ତି ।
ମସ୍ତିଷ୍କରେ ଥିବା ସ୍ନାୟୁ ମଧ୍ୟରେ ଠିକ୍ ଭାବେ ରକ୍ତ ସଞ୍ଚାଳନ ହେଲେ ବ୍ରେନ୍ ଷ୍ଟ୍ରୋକ୍ ହେବାର ସମ୍ଭାବନା ଥାଏ ବୋଲି ବିଶ୍ୱ ମସ୍ତିଷ୍କାଘାତ ଦିବସ ଅବସରରେ କିମସ୍-ଭୁବନେଶ୍ୱର ସ୍ନାୟୁ ବିଜ୍ଞାନ ବିଭାଗ ମୁଖ୍ୟ ତଥା ଆସୋସିଏଟ୍ ପ୍ରଫେସର ଡା. ସନ୍ତୋଷ ଦାଶ କହିଛନ୍ତି । ଷ୍ଟ୍ରୋକ୍ ହେବାର ପ୍ରାରମ୍ଭିକ ସମୟ ଅତ୍ୟନ୍ତ ଗୁରୁତ୍ୱପୂର୍ଣ୍ଣ । କାରଣ ତ୍ୱରିତ ଚିକିତ୍ସା ମସ୍ତିଷ୍କ ସ୍ନାୟୁକୁ ସ୍ଥାୟୀ ଭାବେ କ୍ଷତି ହେବାରୁ ରକ୍ଷା କରିଥାଏ । ଏଭଳି ପରିସ୍ଥିତିରେ ତୁରନ୍ତ ଡାକ୍ତରଙ୍କ ପରାମର୍ଶ ନେବା ସହ ଚିକିତ୍ସା କରାଗଲେ ଷ୍ଟ୍ରୋକ୍ରୁ ସମ୍ପୂର୍ଣ୍ଣ ସୁସ୍ଥ ହେବାର ସମ୍ଭାବନା ଥାଏ ନଚେତ୍ ରୋଗୀ ସ୍ଥାୟୀ ଅକ୍ଷମ ହୋଇପାରେ । ବ୍ରେନ୍ ଷ୍ଟ୍ରୋକ୍ ହେବାର ୩ ଘଣ୍ଟା ମଧ୍ୟରେ ରୋଗୀ ଡାକ୍ତରଖାନାରେ ପହଞ୍ଚାଇ ତାଙ୍କର ଚିକିତ୍ସା କରାଗଲେ ରୋଗୀ ସୁସ୍ଥ ହେବାର ସମ୍ଭାବନା ରହିଛି ବୋଲି ଡା.ଦାଶ କହିଛନ୍ତି ।
ଜନସାଧାରଣ ବ୍ରେନ୍ ଷ୍ଟ୍ରୋକ୍ ଏବଂ ଏହାର ଲକ୍ଷଣ ବିଷୟରେ ସଚେତନ ହେବା ଉଚିତ୍ । ଷ୍ଟ୍ରୋକ୍ ଲକ୍ଷଣ ଦେଖାଦେଲେ ତୁରନ୍ତ୍ର ଡାକ୍ତରଖାନାରେ ପହଞ୍ଚି ଚିକିତ୍ସା କରାଇବା ଉଚିତ୍ । ଏହି କ୍ଷେତ୍ରରେ ସମୟକୁ ଗୁରୁତ୍ୱ ଦେଇ ମୂଲ୍ୟବାନ ଜୀବନ ବଞ୍ଚାଇବା ଆମର ମୂଳ ଲକ୍ଷ୍ୟ ହେବା ଉଚିତ୍ ବୋଲି ଡା. ଦାଶ କହିଛନ୍ତି । ବ୍ରେନ୍ ଷ୍ଟ୍ରୋକ୍ର କୌଣସି ଲକ୍ଷଣ ଦେଖାଗଲେ ରୋଗୀକୁ ତୁରନ୍ତ ହସ୍ପିଟାଲ ନେଇ ଚିକିତ୍ସା ଆରମ୍ଭ କରାଯିବା ଆବଶ୍ୟକ ବୋଲି ପରାମର୍ଶ ଦେଇଛି ସୁଇଜରଲ୍ୟାଣ୍ଡର ଜେନେଭାସ୍ଥିତ ୱାର୍ଲ୍ଡ ଷ୍ଟ୍ରୋକ୍ ଅର୍ଗାନାଇଜେସନ୍ । ଲୋକଙ୍କ ମଧ୍ୟରେ ସଚେତନତା ସୃଷ୍ଟି କରିବା ପାଇଁ ପ୍ରତିବର୍ଷ ଅକ୍ଟୋବର ୨୯ରେ ବିଶ୍ୱ ମସ୍ତିଷ୍କାଘାତ ଦିବସ ପାଳନ କରାଯାଏ । ଏହାଦ୍ୱାରା ଲୋକଙ୍କ ମଧ୍ୟରେ ସଚେତନତା ସୃଷ୍ଟି ହେବା ସହ ରୋଗର ପ୍ରାଥମିକ ଚିକିତ୍ସାର ମହତ୍ତ୍ୱ ବିଷୟରେ ଲୋକମାନେ ହୃଦୟଙ୍ଗମ କରିପାରିବେ । ଯେ କୌଣସି ଷ୍ଟ୍ରୋକ୍ ପୀଡ଼ିତଙ୍କୁ ସାହାଯ୍ୟ କରିବା ପାଇଁ ଆମେ ସମସ୍ତେ ଆଗକୁ ଆସିବା ଉଚିତ୍ । ଯାହା ଦ୍ୱାରା ଏଥିରେ ପୀଡ଼ିତ ବ୍ୟକ୍ତି ଉପକୃତ ହୋଇପାରିବେ ବୋଲି ଡା. ଦାଶ ପରାମର୍ଶ ଦେଇଛନ୍ତି ।
