ଭୀମ ପୃଷ୍ଟି ୪୪ତମ ଶାରଳା ପୁରସ୍କାରରେ ସମ୍ମାନିତ, ବେଣୁଧର ଓ ମୋହିନୀମୋହନଙ୍କୁ କଳା ସମ୍ମାନ
ଭୁବନେଶ୍ୱର, ୨୬/୧୦: ଶ୍ରେଷ୍ଠ ସାହିତ୍ୟ କୃତି ପାଇଁ ପ୍ରତି ବର୍ଷ ଇଣ୍ଡିଆନ୍ ମେଟାଲ୍ସ ପବ୍ଲିକ୍ ଚାରିଟେବୁଲ ଟ୍ରଷ୍ଟ (ଇମ୍ପାକ୍ଟ) ପକ୍ଷରୁ ପ୍ରଦାନ କରାଯାଉଥିବା ମର୍ଯ୍ୟାଦାଜନକ ‘ଶାରଳା ପୁରସ୍କାର’ ଚଳିତ ବର୍ଷ ସୁଖ୍ୟାତ କଥାକାର ଭୀମ ପୃଷ୍ଟିଙ୍କୁ ପ୍ରଦାନ କରାଯାଇଛି । ଗୁରୁବାର ସନ୍ଧ୍ୟାରେ ସ୍ଥାନୀୟ ସ୍ୱସ୍ତି ପ୍ରିମିୟମ୍ ହୋଟେଲରେ ଆୟୋଜିତ ଏକ ବର୍ଣ୍ଣାଢ଼୍ୟ ଉତ୍ସବରେ ମୁଖ୍ୟ ଅତିଥି ଭାବେ ଯୋଗ ଦେଇ ବିଶିଷ୍ଟ ମରାଠୀ ଲେଖକ ଡ. ଜ୍ଞାନେଶ୍ୱର ମୁଲେ ଶ୍ରୀ ପୃଷ୍ଟିଙ୍କୁ ଏହି ପୁରସ୍କାର ପ୍ରଦାନ କରିଛନ୍ତି ।
ଉପନ୍ୟାସ ‘ଜମ୍ବୁଲୋକ’ ପାଇଁ ପ୍ରାପ୍ତ ଏହି ପୁରସ୍କାର ଭାବରେ ଲେଖକଙ୍କୁ ତାମ୍ରଫଳକ ସହିତ ପାଞ୍ଚଲକ୍ଷ ଟଙ୍କାର ଅର୍ଥରାଶି ପ୍ରଦାନ କରାଯାଇଛି । ଏଥିସହିତ କଳା କ୍ଷେତ୍ରରେ ଜୀବନବ୍ୟାପି ସାଧନା ପାଇଁ ଦୁଇଲକ୍ଷ ଟଙ୍କା ଲେଖାଏଁ ଅର୍ଥରାଶି ଓ ତାମ୍ରଫଳକ ସହ ବର୍ଷିୟାନ୍ ପଟ୍ଟଚିତ୍ର ଶିଳ୍ପୀ ଗୁରୁ ବେଣୁଧର ମହାପାତ୍ର ଏବଂ ପ୍ରସିଦ୍ଧ ବଂଶୀବାଦକ ଗୁରୁ ମୋହିନୀ ମୋହନ ପଟ୍ଟନାୟକଙ୍କୁ ‘ଇଲା-ବଂଶୀଧର ପଣ୍ଡା କଳା ସମ୍ମାନ’ ପ୍ରଦାନ କରାଯାଇଛି ।
ଉତ୍ସବରେ ଅଧ୍ୟକ୍ଷତା କରି ଇମ୍ପାକ୍ଟର ଟ୍ରଷ୍ଟି ଶ୍ରୀମତୀ ପାରମିତା ପଣ୍ଡା କହିଥିଲେ ଯେ ଏବେ ଓଡ଼ିଆ ଭାଷା ଦେଶର ଷଷ୍ଠ ପ୍ରାଚୀନ ଭାଷା ଭାବେ ଶାସ୍ତ୍ରୀୟ ମାନ୍ୟତା ପାଇବା ପରେ ଉଭୟ ସରକାରୀ ଓ ବେସରକାରୀ ସ୍ତରରେ ଓଡ଼ିଆ ଭାଷାକୁ ନେଇ ତତ୍ପରତା ବୃଦ୍ଧି ହୋଇଛି । ଆଜିକୁ ଚାରି ଦଶନ୍ଧି ତଳେ ଓଡ଼ିଆ ଭାଷା-ସାହିତ୍ୟର ସମୂହ ବିକାଶ ଓ ସମୃଦ୍ଧି ପାଇଁ, ବିଶେଷକରି ନୂତନ ଲେଖକଙ୍କୁ ସାହିତ୍ୟ ପ୍ରତି ଆକର୍ଷିତ ଓ ଉତ୍ସାହିତ କରିବା ଲକ୍ଷ୍ୟ ନେଇ ଡ. ବଂଶୀଧର ପଣ୍ଡା ଓ ଇଲା ପଣ୍ଡା ‘ଶାରଳା ପୁରସ୍କାର’ ପ୍ରବର୍ତ୍ତନ କରିଥିଲେ । ଓଡ଼ିଶାର କଳା-ସାହିତ୍ୟକୁ ଏକ ସମ୍ମାନଜନକ ଉଚ୍ଚତାକୁ ନେବା ପଛରେ ଉଭୟଙ୍କର ସ୍ପଷ୍ଟ ଆଭିମୁଖ୍ୟ ଓ ନିରନ୍ତର ଉଦ୍ୟମ ଆଜି ସଫଳ ହୋଇଛି ।
ଏହି ଅବସରରେ ମୁଖ୍ୟଅତିଥି ଡ. ଜ୍ଞାନେଶ୍ୱର ମୁଲେ କହିଥିଲେ ଯେ ସାହିତ୍ୟ ମୋର ପ୍ରଥମ ପ୍ରେମ, ଯାହା କ୍ରମେ ଜୀବନ ପାଲଟିଯାଇଛି । ଜୀବନର ସବୁ ରହସ୍ୟ ନିସଙ୍କୋଚରେ କବିତା ମାଧ୍ୟମରେ କହିହୁଏ । ଜଣେ ଲେଖକର ସବୁ ପରିବର୍ତ୍ତନର ଆଭାସ ତାର ଲେଖା ମାଧ୍ୟମରେ ମିଳେ । ଲେଖିବା ଓ ପଢ଼ିବା ଏମିତି ଶକ୍ତି ଦିଏ, ଶରୀର କ୍ଳାନ୍ତ ଥିଲେ ମଧ୍ୟ ଅନ୍ୟକୌଣସି ମନୋରଞ୍ଜନର ଆବଶ୍ୟକତା ପଡ଼େନି ।
ଶାରଳା ପୁରସ୍କାର ପ୍ରାପକ ଭୀମ ପୃଷ୍ଟି କହିଥିଲେ ଯେ ସବୁ କାହାଣୀ ମଣିଷର । ମଣିଷ ଥିବାଯାଏ କାହାଣୀର ଶେଷ ନାହିଁ । ସବୁ ଶରଣାର୍ଥୀଙ୍କ ପ୍ରତୀକ ହେଉଛି ‘ଜମ୍ବୁଲୋକ\’ ଉପନ୍ୟାସ ।
ଉତ୍ସବର ଦ୍ୱିତୀୟ ସୋପାନରେ କବି କେଦାର ମିଶ୍ରଙ୍କ ସଂଚାଳନରେ ଡ. ମୁଲେ ଏବଂ ଭୀମ ପୃଷ୍ଟିଙ୍କ ମଧ୍ୟରେ ସାଂପ୍ରତିକ ସାହିତ୍ୟକୁ ନେଇ ଏକ ଆଲୋଚନାଚକ୍ର ଅନୁଷ୍ଠିତ ହୋଇଥିଲା । ଏହି ଅବସରରେ ‘ଟାଇମପାସ୍’ ଦ୍ୱାରା ପ୍ରକାଶିତ ଓ ପ୍ରବାସିନୀ ମହାକୁଡ଼ଙ୍କ ଦ୍ୱାରା ଅନୂଦିତ ଜ୍ଞାନେଶ୍ୱର ମୁଲେଙ୍କ କବିତା ପୁସ୍ତକ ‘ଋତୁ ଉଇଁଆସୁଚି’ ଲୋକାର୍ପିତ ହୋଇଥିଲା ।
ଅଭିନେତ୍ରୀ ମଧୁମିତା ମହାନ୍ତିଙ୍କ ସଂଯୋଜନାରେ ଅନୁଷ୍ଠିତ ଏହି ଉତ୍ସବରେ ଆଦୃତ ଚିଲ୍ଡ୍ରେନ୍ ହୋମ ଦ୍ୱାରା ସ୍ୱାଗତ ସଙ୍ଗୀତ ପରିବେଷଣ କରାଯାଇଥିଲା । ରାଜ୍ୟର ବିଭିନ୍ନ ପ୍ରାନ୍ତରୁ ଲେଖକ ଓ କଳାକାରମାନେ ଯୋଗଦେଇ କାର୍ଯ୍ୟକ୍ରମକୁ ସଫଳ କରିଥିଲେ । ଇମ୍ଫା କର୍ପୋରେଟ୍ ଆଫେୟାର୍ସର ମୁଖ୍ୟ କିଶୋର ମହାନ୍ତି, ଶାରଳା ସଚିବାଳୟର ମୁଖ୍ୟ ସଂଯୋଜକ ସରୋଜ ବଳ ପ୍ରମୁଖ ଉତ୍ସବ ପରିଚାଳନାରେ ସହଯୋଗ କରିଥିଲେ ।
ଏଠାରେ ସୂଚନାଯୋଗ୍ୟ ଯେ ବିଶିଷ୍ଟ ଶିଳ୍ପପତି ତଥା ବୈଜ୍ଞାନିକ ଡ. ବଂଶୀଧର ପଣ୍ଡା ଓ ତାଙ୍କର ସହଧର୍ମିଣୀ ଇଲା ପଣ୍ଡାଙ୍କ ଉଦ୍ୟମରେ ପ୍ରତିଷ୍ଠିତ ‘ଇମ୍ପାକ୍ଟ’ ତରଫରୁ ଶାରଳା ପୁରସ୍କାର, ଇଲା-ବଂଶୀଧର ପଣ୍ଡା କଳା ସମ୍ମାନ ସହିତ ଏକଲବ୍ୟ ଏବଂ ଶାମ୍ଭବୀ ପୁରସ୍କାର ମଧ୍ୟ ପ୍ରଦାନ କରାଯାଇଆସୁଛି ।
