ସମସ୍ତ କଳ୍ପନା ଜଳ୍ପନା ର ଅନ୍ତ ଘଟାଇ ସୁରକ୍ଷିତ ଭାବେ ଜନ୍ମ ନେଲେ ଅଜଗର ଛୁଆ

ଖୋର୍ଦ୍ଧା : ୩୦/୦୬(ପ୍ରବାହ ନିଉଜ୍) ଖୋର୍ଦ୍ଧା ଜିଲ୍ଲା ଗଡ଼ନିଆଳ ଗ୍ରାମ ନିକଟ ଜଙ୍ଗଲ ଏକ ପଥର ଖୋଲ ଭିତରୁ ଉଦ୍ଧାର ହୋଇଥିବା ଅଜଗର ସାପ ଅଣ୍ଡାରୁ ବୁଧବାର ଦିନ ଛୁଆ ବାହାରିଛନ୍ତି। ମିନଚିନପାଟଣା ସ୍ଥିତ ହଳଦିଆ ବନାଞ୍ଚଳ ଅଧିକାରୀଙ୍କ କାର୍ଯ୍ୟାଳୟ ପରିସରରେ ସୁରକ୍ଷିତ ଭାବେ ରଖାଯାଇଥିବା ୨୭ଟି ସାପ ଅଣ୍ଡା ମଧ୍ୟରୁ ଗତ ମଙ୍ଗଳବାର ଅପରାହ୍ନରେ ପ୍ରଥମେ ଗୋଟିଏ ଅଣ୍ଡା ଫୁଟିବା ପରେ ଅଜଗର ଛୁଆ ଜନ୍ମ ହୋଇଥିଲା। ବୁଧବାର ସକାଳେ କ୍ରମଶଃ ଅବଶିଷ୍ଟ ଅଣ୍ଡା ଫୁଟିବା ସହିତ ସମସ୍ତ ସାପ ଛୁଆ ଗୁଡିକ ଜନ୍ମ ହୋଇଥିଲେ ।

ଜନ୍ମ ହୋଇଥିବା ସମସ୍ତ ସାପ ଛୁଆ ଗୁଡିକ ପ୍ରାୟ ୨ ଫୁଟ ଲମ୍ବର ହୋଇଥିବା ଜଣାପଡିଛି। ଗୁରୁବାର ଦିନ ସମସ୍ତ ୨୭ ଅଜଗର ସାପ ଛୁଆଙ୍କୁ ଚନ୍ଦକା ଅଭୟାରଣ୍ୟର ଭିନ୍ନ ଭିନ୍ନ ପ୍ରାକୃତିକ ପରିବେଶରେ ଛାଡିବା ପାଇଁ ବ୍ୟବସ୍ଥା କରାଯିବ। ସମସ୍ତ ସାପ ଛୁଆଙ୍କୁ ଏକାଠି ଛାଡିଲେ ସେମାନଙ୍କ ମଧ୍ୟରେ ଖାଦ୍ୟ ପାଇଁ ପ୍ରତିଦ୍ବନ୍ଦିତା ହୋଇପାରେ। ତେଣୁ ୩ ସ୍ଥାନରେ ସେମାନଙ୍କୁ ଛାଡିବା ପାଇଁ ବିଚାର କରୁଥିବା ନେଇ ହଳଦିଆ ରେଞ୍ଜର ଜୟକୃଷ୍ଣ ପଣ୍ଡାସୂଚନା ଦେଇଛନ୍ତି ।

ସୂଚନା ଅନୁସାରେ ଗତ ମେ ମାସ ୫ତାରିଖରେ ଗଡ ନିଆଳ ଗାଁ ନିକଟ ଜଙ୍ଗଲରେ ଏକ ବିରାଟ ଅଜଗର ସାପକୁ ଦେଖି ସ୍ନେକ ହେଲ୍ପଲାଇନ୍ ସଦସ୍ୟଙ୍କୁ ଜଣାଇଥିଲେ ଗ୍ରାମବାସୀ । ପରେ ଉଭୟ ବନ ବିଭାଗ ଏବଂ ସ୍ନେକ୍ ହେଲ୍ପଲାଇନ୍ ସଦସ୍ୟ ଶୁଭେନ୍ଦୁ ମଲ୍ଲିକ ଘଟଣା ସ୍ଥଳରେ ପହଞ୍ଚି ସାପଟି ଅଣ୍ଡା ଦେଇଥିବା ଜାଣି ପାରିଥିଲେ। ସାପଟି ସେହିଠାରେ ରହି ଅଣ୍ଡାରୁ ଛୁଆ ଫୁଟାଇବା ଯାଏଁ ତାକୁ ଗ୍ରାମବାସୀ ସୁରକ୍ଷା ଦେବେ ବୋଲି ନିଷ୍ପତି ନେଇଥିଲେ ।

କିନ୍ତୁ ଆଗକୁ ବର୍ଷାଦିନ ଆସିବା ସହିତ ଜଙ୍ଗଲୀ ଜୀବଜନ୍ତୁଙ୍କ ଠାରୁ ଅଣ୍ଡା ଗୁଡିକୁ ସୁରକ୍ଷା ଦିଆଯିବ ସେ କଥାକୁ ଗୁରୁତ୍ୱ ଦେଇ ଅଣ୍ଡାଗୁଡିକୁ ଉଦ୍ଧାର କରି ପ୍ରଥମେ ଗଡ଼ ନିଆଳ ସ୍କୁଲ ଘରେ ଅଣ୍ଡା ଗୁଡିକୁ ରଖିଥିଲେ । କିନ୍ତୁ ପାରିପାର୍ଶ୍ବିକ ଅବସ୍ଥିତି ଏବଂ ସେଠାରେ ଅଣ୍ଡାଗୁଡିକରେ ପିମ୍ପୁଡି ଲାଗିବାରୁ ଅଣ୍ଡାର ସୁରକ୍ଷାକୁ ନେଇ ଅନେକ ପ୍ରଶ୍ନବାଚୀ ସୃଷ୍ଟି ହେବାପରେ ପରବର୍ତ୍ତୀ ସମୟରେ ମିନିସିଂହ ପାଟଣା ସ୍ଥିତ ହଳଦିଆ ରେଞ୍ଜ ଅଫିସକୁ ଅଣ୍ଡାଗୁଡିକୁ ସ୍ଥାନାନ୍ତରିତ କରାଯିବା ସହିତ କାର୍ଯ୍ୟାଳୟର ପରିସର ମଧ୍ୟରେ ଥିବା ଏକ ଗୃହରେ ସୁରକ୍ଷିତ ଭାବରେ ରଖି ସ୍ନେକ ହେଲ୍ପଲାଇନ ସହାୟତାରେ କୃତ୍ରିମ ଉପାୟରେ ଫୁଟେଇବା ପାଇଁ ବ୍ୟବସ୍ଥା କରା ଯାଇଥିଲା ।

ସୁରକ୍ଷିତ ଭାବେ ଅଣ୍ଡାଗୁଡିକ ରଖିଯାଇଥିବା ବେଳେ ଦୀର୍ଘ ୫୫ଦିନ ପରେ ବୁଧବାର ସକାଳେ ସମସ୍ତ ଅଣ୍ଡା ଫୁଟିଥିବା ବେଳେ ୮ରୁ ୧୦ ଟି ଅଣ୍ଡାରୁ ଛୁଆ ବାହାରି ଖେଳୁଥିବାର ଦେଖିବାକୁ ମିଳିଛି । ଏପଟେ ପ୍ରାୟ ସମସ୍ତ ଅଣ୍ଡାରୁ ସୁରକ୍ଷିତ ଭାବେ ସାପ ଛୁଆ ଜନ୍ମକୁ ନେଇ ହଳଦିଆ ରେଞ୍ଜର ଓ ସ୍ନେକ ହେଲ୍ପଳାଇନ ର ସଦସ୍ୟ ଖୁସି ବ୍ୟକ୍ତ କରିଛନ୍ତି ।