ପହଞ୍ଚି ପାରିଲାନି ଆମ୍ବୁଲାନ୍ସ : ଷ୍ଟ୍ରେଚରରେ ବୁହା ହେଲେ ଗର୍ଭବତୀ : ରାସ୍ତାରେ ପ୍ରସବ ହେଲା କନ୍ୟା ସନ୍ତାନ

ଯୋଡା: ୩/୯(ପ୍ରବାହ ନିଉଜ) ପୁଣି ଦେଖିବାକୁ ମିଳିଛି ଜନନୀ ଯନ୍ତ୍ରଣା ଦୁର୍ଦ୍ଦଶାର କରୁଣ ଚିତ୍ର । ଗାଁକୁ ରାସ୍ତା ନଥିବାରୁ ଷ୍ଟ୍ରେଚରରେ ବୁହା ହେଲେ ଗର୍ଭବତୀ । ରାସ୍ତାରେ ପ୍ରସବ ହେଲା କନ୍ୟା ସନ୍ତାନ । ଏଭଳି ଅଭାବନୀୟ ଚିତ୍ର ଆସିଛି କେନ୍ଦୁଝର ଜିଲ୍ଲା ଯୋଡା ଅନ୍ତର୍ଗତ ଜଜାଙ୍ଗ ଗ୍ରାମ ପଞ୍ଚାୟତର ପାଣ୍ଡିଆ ଗାଁରୁ । ଦୃଶ୍ୟଟି ଯେତିକି ଅବିଶ୍ୱାସନୀୟ ସେତିକି ଅକଳ୍ପନୀୟ ମଧ୍ୟ । ଯୋଡା ଖଣିମଣ୍ଡଳର ରାଜସ୍ୱରେ ସାରା ରାଜ୍ୟର ରାଜକୋଷ ଭରପୁର, କିନ୍ତୁ ଅନେକ ଗୁଡ଼ିଏ ମୌଳିକ ସୁବିଧାରୁ ବଞ୍ଚିତ ହୋଇ ରହିଥିବା ଏହି ଅଞ୍ଚଳକୁ ଲୋକଙ୍କ ସ୍ୱାସ୍ଥ୍ୟସେବା ପାଇଁ ଗାଁକୁ ଯାଇପାରୁନାହିଁ ଆମ୍ବୁଲାନ୍ସ । ସ୍ଥାନୀୟ ଅଧିବାସୀ ମାନେ ସରକାର ଏବଂ ସ୍ଥାନୀୟ ପ୍ରଶାସନର ଉଦାସୀନତା ଯୋଗୁଁ ଦୀର୍ଘଦିନ ଧରି ଯାତାୟତ ଜନିତ ନାହିଁନଥିବା ଦୁର୍ଦ୍ଦଶାର ସମ୍ମୁଖୀନ ହୋଇଆସୁଛନ୍ତି ।

କେନ୍ଦୁଝର ଜିଲ୍ଲା ଚମ୍ପୁଆ ନିର୍ବାଚନ ମଣ୍ଡଳୀ ଅନ୍ତର୍ଗତ ଯୋଡା ବ୍ଲକ ଜଜାଙ୍ଗ ଗ୍ରାମ ପଞ୍ଚାୟତର ପାଣ୍ଡିଆ ଗାଁ । ଯିଦ୍ଧି ଓରାମ ନାମକ ଜଣେ ଗର୍ଭବତୀ ମହିଳାଙ୍କୁ ପ୍ରସବ ଜନିତ ଯନ୍ତ୍ରଣା ଅନୁଭବ ହେବାରୁ ୧୦୮ ଆମ୍ବୁଲାନ୍ସକୁ ଫୋନ କରି ଜଣାଇଥିଲେ ଗର୍ଭବତୀ ମହିଳାଙ୍କ ପରିବାର ଲୋକେ । ତେବେ ଉକ୍ତ ଗ୍ରାମକୁ ଭଲ ରାସ୍ତା ନଥିବାରୁ ୧୦୮ ଆମ୍ବୁଲାନ୍ସ ଟି ନିର୍ଦ୍ଧିଷ୍ଟ ସ୍ଥାନରେ ପହଞ୍ଚି ପାରି ନଥିଲା। ଗାଁ ଠାରୁ ପ୍ରାୟ ଦେଢ କିଲୋମିଟର ଦୂରରେ ଅଟକି ରହିଥିଲା । ଦେଢ କିଲୋମିଟର ଦୂରରେ ଅଟକି ରହିଥିବା ଆମ୍ବୁଲାନ୍ସ ପାଖକୁ ଜଣେ ଆସନ୍ନପ୍ରସବା ମହିଳାଙ୍କୁ ଗୁରୁତର ଅବସ୍ଥାରେ ଷ୍ଟ୍ରେଚରରେ ବୋହି ବୋହି ଆଣିବା ଏ ଅଞ୍ଚଳର ଉନ୍ନତିର ନଗ୍ନତା ସ୍ଥିତି ଏବଂ ସରକାରଙ୍କ ଜନାଭିମୁଖୀ ଯୋଜନାର ସତ୍ୟତାକୁ ପଦାରେ ପକାଇଛି । ଏଣେ ପ୍ରସୂତୀଙ୍କ ପ୍ରସବ ବେଦନା ବୃଦ୍ଧି ପାଇବା ସହ ସ୍ୱାସ୍ଥ୍ୟାବସ୍ଥା କ୍ରମଶଃ ଜଟିଳ ହେଉଥିବା ଲକ୍ଷ୍ୟ କରି ଆମ୍ବୁଲାନ୍ସ କର୍ମଚାରୀ ବିକଳ୍ପ ବ୍ୟବସ୍ଥା ସ୍ୱରୂପ ପ୍ରସୂତୀଙ୍କୁ ଷ୍ଟ୍ରେଚରରେ ଶୁଆଇ ଆମ୍ବୁଲାନ୍ସ ନିକଟକୁ ଦୀର୍ଘ ଦେଢ଼ କିଲୋମିଟର ବାଟ ବୋହି ବୋହି ଆଣିଥିଲେ ।

ତେବେ ବିଧିର ବିଧାନ ସ୍ୱରୂପ ପ୍ରସୂତୀ ଜଣଙ୍କ ଆମ୍ବୁଲାନ୍ସ ନିକଟରେ ପହଞ୍ଚିବା ପୂର୍ବରୁ ମହିଳା ଜଣକ ରାସ୍ତାରେ କନ୍ୟା ସନ୍ତାନକୁ ଜନ୍ମ ଦେବା ଘଟଣା ସ୍ଥାନୀୟ ଅଧିବାସୀଙ୍କ ମଧ୍ୟରେ ତୀବ୍ର ଅସନ୍ତୋଷ ସୃଷ୍ଟି କରିଛି । ପରେ ଆମ୍ବୁଲାନ୍ସ ଯୋଗେ ଉଭୟ ମା ଓ ନବଜାତ ଶିଶୁଙ୍କୁ କମାରଯୋଡା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରା ଯାଇଥିବା ବେଳେ ଉଭୟ ମା ଓ ଶିଶୁ କନ୍ୟାଙ୍କ ସ୍ୱାସ୍ଥ୍ୟାବସ୍ଥାରେ କୌଣସି ପ୍ରକାର ଅବନ୍ନତି ଘଟି ନଥିବା ଜଣାପଡିଛି । ସୂଚନା ମୁତାବକ, ନିକଟରେ ବଡ ବଡ ଖଣି କମ୍ପାନୀ ନିଜର ବ୍ୟବସାୟିକ କଳେବର ଆରମ୍ଭ ନିମନ୍ତେ ଉକ୍ତ ଗ୍ରାମ ନିକଟରେ ପଲ୍ଲୀସଭା କରି ବିଭିନ୍ନ ପ୍ରତିଶ୍ରୁତି ମାନ ଦେଇଥିଲେ, କିନ୍ତୁ ଏହି ଗ୍ରାମକୁ ଘେରି ରହିଥିବା କମ୍ପାନୀ ଗୁଡିକ ନିଜର କାର୍ଯ୍ୟ ହାସଲ ପରେ କରିଥିବା ପ୍ରତିଶ୍ରୁତି ଏବେ ପାଣିର ଗାର ପାଲଟିଛି ।