ଖାଇବା ସୁଜି କୁ ନେଇ ଗାଁ ଦାଣ୍ଡରେ ରକ୍ତପାତ

ଟାଙ୍ଗୀ : ୨୧/୧/୨୦୨୧ : ଖୋର୍ଦ୍ଧା ଜିଲ୍ଲା ଟାଙ୍ଗୀ ଥାନା ଅନ୍ତର୍ଗତ କାଳୁପଡ଼ା ଘାଟ ଅଞ୍ଚଳର ବାଲିନାସି ଗ୍ରାମର ଗୋପାଳ ସାହୁ ନିଜ ଗାଁରେ ଜଳଖୁଆ ବ୍ୟବସାୟ କରେ । ନିଜ ଦୋକାନ ବ୍ୟବସାୟ ପାଇଁ ସଉଦା କିଣି ସାଇକେଲରେ ଫେରୁଥିବା ସମୟରେ ସାମ୍ନାରୁ ଆସୁଥିବା ସେହି ଗ୍ରାମର ରାମହରି ଜାଲି ଯୁବକର ସାଇକେଲ ସହ ଅକସ୍ମାତ ଧକ୍କା ହେବାରୁ ଟଙ୍ଗା ହୋଇଥିବା ଜରିଟି ଛିଡି ସମସ୍ତ ସୁଜି ନଷ୍ଟ  ହୋଇଯାଇଥିଲା। ଏହାକୁ ନେଇ ଉଭୟ ପାଟିତୁଣ୍ଡ ଓ ହାତାହାତି ହୋଇଥିଲେ।

ଖବର ପାଇ ଗୋପାଳ ସାହୁଙ୍କ ଭାଇ ଯଦୁମଣି ସାହୁ ଘଟଣା ସ୍ଥଳକୁ ଆସିବାରେ ସାମାନ୍ୟ ପାଟିତୁଣ୍ଡ ଉଗ୍ରରୂପ ନେଇଥିଲା । ଦୁଇ ଭାଇଙ୍କର ଆକ୍ରମଣ ରୁ ବଞ୍ଚିବା ପାଇଁ ରାମହରି ଘରୁ ଫାର୍ସା ଆଣି ସେଥିରେ ଦୁଇଭାଇଙ୍କୁ ଆକ୍ରମଣ କରି ଲହୁଲୁହାଣ କରିଦେଇଥିଲା । ଦିବାଲୋକରେ ଗାଁ ମଝିରେ ରକ୍ତପାତ ହେଉଥିଲେ ମଧ୍ୟ ଗାଁ ଲୋକ ଏ ଘଟଣାକୁ ବନ୍ଦ କରିବାକୁ ସାହସ ଜୁଟାଇ ପାରିନଥିଲେ।

ଅପରପକ୍ଷରେ ମାରଣାସ୍ତ୍ର ରେ ଆକ୍ରମଣ କରିଥିବା ରାମହରି ସାମାନ୍ୟ ରୂପେ ଆହତ ହୋଇଥିବା ବେଳେ ଗୁରୁତର ଆହତ ଗୋପାଳକୁ ପ୍ରଥମେ ଟାଙ୍ଗୀ ଡାକ୍ତରଖାନା ଏବଂ ପରବର୍ତ୍ତୀ ସମୟରେ ଖୋର୍ଦ୍ଧା ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି ଏବଂ ଆହତ ଯଦୁମଣିକୁ ଟାଙ୍ଗୀ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ରେ ପ୍ରାଥମିକ ଚିକିତ୍ସା କରାଯାଇ ଛଡ଼ାଯାଇଛି। ଉଭୟ ପକ୍ଷରୁ ଏ ଘଟଣାକୁ ନେଇ ପୃଥକ ପୃଥକ ମାମଲା ରୁଜ୍ଜୁ କରାଯାଇଥିବା ବେଳେ
ଟାଙ୍ଗୀ ପୋଲିସ ରାମହରି କୁ ଅଟକ ରଖିଛି ।

Leave a Reply

Your email address will not be published. Required fields are marked *