ଓଡିଆ ନୂଆବର୍ଷରେ ଉତ୍ସବମୁଖର ପରିବେଶ, ପଣାପାଣିରେ ମଜ୍ଜିଲେ ସହରବାସୀ
ଯୋଡା,୧୪/୪ ଶୁକ୍ରବାର ଥିଲା ଓଡିଆ ଜନଜୀବନର ଏକ ପବିତ୍ର ଦିନ । ମହାବିଷୁବ ସଂକ୍ରାନ୍ତି ଓ ଓଡିଆ ନବବର୍ଷ । ଏହି ଉତ୍କଳୀୟ ପରମ୍ପରାରେ ଉତ୍ସବମୁଖର ହୋଇଛି ପୁରା ପରିବେଶ । ଗାଁ ଠାରୁ ସହର ପର୍ଯ୍ୟନ୍ତ ସବୁଠି ପଣାସଂକ୍ରାନ୍ତିର ନିଆରା ଅନୁଭବ ଦେଖିବାକୁ ମିଳିଛି । ଏହି ଅବସରରେ ଖଣି ଅଞ୍ଚଳ ଯୋଡା ସହରରେ ଶୁକ୍ରବାର ନବବର୍ଷ ପାଳନ ସାଙ୍ଗକୁ ପଣାସଂକ୍ରାନ୍ତିରେ ବେଲପଣା ପିଇ ପରସ୍ପରକୁ ସ୍ନେହ ଶ୍ରଦ୍ଧା ବନ୍ଧନରେ ବାନ୍ଧି ହେଉଥିବା ବେଳେ ବିଭିନ୍ନ ମନ୍ଦିର ପ୍ରାଙ୍ଗଣରେ କାର୍ଯ୍ୟକ୍ରମ ମାନ ଅନୁଷ୍ଠିତ ହୋଇଥିଲା । ଏହି ପରିପ୍ରେକ୍ଷୀରେ ଯୋଡା ବ୍ଲକ କଲୋନୀ ସନ୍ନିକଟରେ କିଛି ଯୁବଗୋଷ୍ଠୀଙ୍କ ମିଳିତ ପ୍ରଚେଷ୍ଟାରେ ଆୟୋଜିତ ଓଡିଆ ନବବର୍ଷ ତଥା ପଣାସଂକ୍ରାନ୍ତି ଅବସରରେ ବିଭିନ୍ନ ପ୍ରକାର ଫଳ, ଦହି, ବେଲରେ, ଛେନା, ବୁନ୍ଦିଆ ତିଆରି ପଣା ବିତରଣ କରାଯାଇଥିଲା ।
ରାସ୍ତାରେ ଯିବା ଆସିବା କରୁଥିବା ପଥଚାରୀଙ୍କ ସମେତ ସ୍ଥାନୀୟ ଅଞ୍ଚଳର ଲୋକମାନେ ପଣାପାଣି ପାନ କରି ମଜ୍ଜା ଉଠାଇଥିଲେ । ଭକ୍ତହରୀ ଦାସ,ଗଣେଶ ବାରିକ,ନବ କିଶୋର ସାହୁ,ବାସୁଦେବ ପଲେଇଙ୍କ ସମେତ ଅନ୍ୟ ମାନଙ୍କ ସହଯୋଗକ୍ରମେ ଏହି ପଣା ବଣ୍ଟନ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ସେହିପରି ଯୋଡ଼ା ଲକ୍ଷ୍ମୀ ମନ୍ଦିର ପ୍ରାଙ୍ଗଣରେ ପଣା ସଂକ୍ରାନ୍ତି ପାଳନ କରାଯାଇ ଉପସ୍ଥିତ ଲୋକଙ୍କୁ ପଣା ବଣ୍ଟନ କରଯାଇଥିଲା। ଯୋଡ଼ା ପୌର ପାଳିକା ପୌରଧକ୍ଷ ଡ. ଜଗଦୀଶ ପ୍ରସାଦ ସାହୁ, ବରିଷ୍ଠ ନାଗରିକ ନୀଳମଣି ମହାନ୍ତି, ପୁରୁଷୋତ୍ତମ ଦାସ, ଯୋଡ଼ା ଲକ୍ଷ୍ମୀମନ୍ଦିର ପୂଜା କମିଟି ସମ୍ପାଦକ ରବି ନାରାୟଣ ଦାସ,ଯୋଡ଼ା ଟ୍ରକ ମାଲିକ ସମ୍ପାଦକ ସୁଶାନ୍ତ କୁମାର ବରିକ, ଯୋଡ଼ା ବିକାଶ ପରିଷଦ ସଭାପତି ନିରଞ୍ଜନ ବହିଦାରଙ୍କ ସମେତ ବହୁ ଲୋକ ଉପସ୍ଥିତ ରହି ପଣା ପିଇଥିଲେ ।
