ରୋଜଗାର ମେଳାର ଶୁଭାରମ୍ଭ କଲେ ପ୍ରଧାନମନ୍ତ୍ରୀ
ଦେଶବ୍ୟାପୀ ୧୦ ଲକ୍ଷ ଲୋକଙ୍କୁ ନିଯୁକ୍ତି ପ୍ରଦାନ କରିବା ପ୍ରକିୟା ଆରମ୍ଭ
“ ଆମର କର୍ମଯୋଗୀ ମାନଙ୍କର ଉଦ୍ୟମ ଯୋଗୁଁ ସରକାରୀ ବିଭାଗ ଗୁଡିକର ଦକ୍ଷତା ବୃଦ୍ଧି ପାଇଛି ”
ଗତ ୮ ବର୍ଷ ମଧ୍ୟରେ କରା ଯାଇଥିବା ସଂସ୍କାର ଗୁଡିକ ଯୋଗୁଁ ଆଜି ଭାରତ ହେଉଛି ବିଶ୍ୱର ପଂଚମ ବୃହତ୍ତମ ଅର୍ଥନୀତି
“ପୂର୍ବରୁ ଦେଶରେ ଏତେ ବଡ ଆକାରରେ ନିଯୁକ୍ତି ପ୍ରକ୍ରିୟା କେବେ ବି କାର୍ଯ୍ୟକାରୀ ହୋଇ ନଥିଲା ”
“ଆମେ ଦେଶର ଯୁବକ ମାନଙ୍କୁ ଆମର ସବୁଠାରୁ ବଡ଼ ଶକ୍ତି ବୋଲି ବିବେଚନା କରୁଛୁ”
“ଅଧିକରୁ ଅଧିକ ନିଯୁକ୍ତି ସୃଷ୍ଟି କରିବା ପାଇଁ କେନ୍ଦ୍ର ସରକାର ଅନେକ ପଦକ୍ଷେପ ”
“ଏକ ବିଂଶ ଶତାବ୍ଦୀରେ ଭାରତରେ ସରକାରୀ ଚାକିରି ନିମନ୍ତେ ଏକ ନିର୍ଦ୍ଧାରିତ ସମୟ ସୀମା ମଧ୍ୟରେ କାର୍ଯ୍ୟ ସମ୍ପୂ୍ର୍ଣ୍ଣ କରିବା ପାଇଁ ଏହି କାର୍ଯ୍ୟକ୍ରମ ଏକ ପ୍ରତିବଦ୍ଧତା ଅଟେ ”
“ଯେତେବେଳେ ଆପଣମାନେ ଅଫିସ୍ କୁ ଯାଉଛନ୍ତି, ସର୍ବଦା ଆପଣଙ୍କର ‘କର୍ତ୍ତବ୍ୟ ପଥ‘କୁ ମନେ ରଖନ୍ତୁ ”
ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ଭିଡିଓ କନଫରେନ୍ସିଂ ମାଧ୍ୟମରେ ୧୦ ଲକ୍ଷ ଲୋକଙ୍କୁ ନିଯୁକ୍ତି ପ୍ରଦାନ କରିବା ପାଇଁ – ରୋଜଗାର ମେଳାର ଶୁଭାରମ୍ଭ କରିଛନ୍ତି । ଏହି ସମାରୋହରେ ଆଜି ୭୫,୦୦୦ ନୂତନ ଭାବେ ନିଯୁକ୍ତ ବ୍ୟକ୍ତି ମାନଙ୍କୁ ନିଯୁକ୍ତି ପତ୍ର ପ୍ରଦାନ କରା ଯାଇଥିଲା ।
ନିଯୁକ୍ତି ପାଇଥିବା ଲୋକ ମାନଙ୍କୁ ସମ୍ବୋଧିତ କରି ପ୍ରଧାନମନ୍ତ୍ରୀ ଧନତେରାସ୍ ପାଇଁ ଶୁଭେଚ୍ଛା ଓ ଶୁଭକାମନା ଜଣାଇବା ସହ ରୋଜଗାର ମେଳାର ଶୁଭାରମ୍ଭ କରିଥିଲେ । ସେ କହିଥିଲେ ଯେ, “ଆଜି ହେଉଛି ସେହି ଦିନ, ଯାହା ରୋଜଗାର ମେଳା ରୂପରେ ଗତ ୮ ବର୍ଷ ଧରି ଦେଶରେ ରୋଜଗାର ଏବଂ ଆତ୍ମନିର୍ଭର ଭାରତ ଅଭିଯାନ ପାଇଁ ଚାଲିଥିବା ଅଭିଯାନ ଗୁଡିକରେ ଏକ ନୂତନ ଅଧ୍ୟାୟ । ପ୍ରଧାନମନ୍ତ୍ରୀ କହିଥିଲେ ଯେ, “ ସ୍ୱାଧୀନତାର ୭୫ ବର୍ଷକୁ ଧ୍ୟାନରେ ରଖି କେନ୍ଦ୍ର ସରକାର ଏହି କାର୍ଯ୍ୟକ୍ରମ ଅଧୀନରେ ୭୫,୦୦୦ ଯୁବକଯୁବତୀଙ୍କୁ ନିଯୁକ୍ତି ପତ୍ର ପ୍ରଦାନ କରିଛନ୍ତି । ସେ ରୋଜଗାର ମେଳାର ଆବଶ୍ୟକତାକୁ ବୁଝାଇ କହିଥିଲେ , “ଆମେ ସ୍ଥିର କରିଲୁ ଯେ ଗୋଟିଏ ଥର ନିଯୁକ୍ତି ପତ୍ର ପ୍ରଦାନ କରିବାର ଏକ ପରମ୍ପରା ଆରମ୍ଭ ହେବା ଉଚିତ, ଯାହା ଦ୍ୱାରା ବିଭାଗ ଗୁଡିକରେ ଏକ ନିର୍ଦ୍ଧାରିତ ସମୟସୀମା ମଧ୍ୟରେ ପ୍ରକଳ୍ପ ସମାପ୍ତ କରିବାର ସାମୂହିକ ସ୍ୱଭାବ ବିକାଶିତ ହେବ” । ଆଗାମୀ ଦିନରେ ମଧ୍ୟ , ପ୍ରାର୍ଥୀମାନେ ସମୟ ସମୟରେ ସରକାରଙ୍କ ଠାରୁ ସେମାନଙ୍କର ନିଯୁକ୍ତି ପତ୍ର ପାଇବେ । ସେ ଆହୁରି ମଧ୍ୟ କହିଥିଲେ ଯେ, କେନ୍ଦ୍ର ଶାସିତ ଅଂଚଳ ସମେତ ଅନେକ ଏନ୍ଡିଏ ଶାସିତ ରାଜ୍ୟ ତଥା ବିଜେପି ଶାସିତ ରାଜ୍ୟ ସମାନ ଧରଣର ମେଳା ଆୟୋଜନ କରିବେ ବୋଲି ମୁଁ ବହୁତ ଖୁସି ଅଛି ।
ସେମାନଙ୍କର ସାମିଲ୍ ହେବା ସମୟର ମହତ୍ୱକୁ ସ୍ୱାଗତ କରିବା ଏବଂ ଉଲ୍ଲେଖିତ କରିବା ସହିତ ପ୍ରଧାନମନ୍ତ୍ରୀ ନୂତନ ନିଯୁକ୍ତ ବ୍ୟକ୍ତି ମାନଙ୍କୁ କହିଥିଲେ ଯେ, ଅମୃତ କାଳ ଅବଧିରେ ଏକ ବିକଶିତ ଭାରତର ନିର୍ମାଣ ପାଇଁ ଆମେ ଏକ ଆତ୍ମନିର୍ଭରଶୀଳ ଭାରତ ରାସ୍ତାରେ ଅଗ୍ରସର ହେଉଛେ । ଭାରତକୁ ଆତ୍ମନିର୍ଭରଶୀଳ ପଥରେ ଆଗେଇ ନେବାରେ ଉଦ୍ଭାବକ ମାନଙ୍କର, ଉଦ୍ୟୋଗୀ, ଶିଳ୍ପପତି ମାନଙ୍କର, କୃଷକ ମାନଙ୍କର ଏବଂ ଉତ୍ପାଦନ ତଥା ସେବା କ୍ଷେତ୍ରରେ କାର୍ଯ୍ୟ କରୁଥିବା ଲୋକ ମାନଙ୍କର ପ୍ରମୁଖ ଭୂମିକା ରହିଛି ବୋଲି ପ୍ରଧାନମନ୍ତ୍ରୀ ମନ୍ତବ୍ୟ ଦେଇଥିଲେ । ସବ୍କା ପ୍ରୟାସ (ସମସ୍ତଙ୍କର ଚେଷ୍ଟା)ର ମହତ୍ୱ ସମ୍ପର୍କରେ ସୂଚନା ଦେଇ ପ୍ରଧାନମନ୍ତ୍ରୀ କହିଥିଲେ ଯେ, ଏହି ଯାତ୍ରାରେ ସମସ୍ତଙ୍କ ଉଦ୍ୟମ ଗୁରୁତ୍ୱପୂର୍ଣ୍ଣ ଅଟେ ଏବଂ ସମସ୍ତ ଗୁରୁତ୍ୱପୂର୍ଣ୍ଣ ସୁବିଧା ସମସ୍ତଙ୍କ ନିକଟରେ ପହଂଚିବା ପରେ ସବ୍କା ପ୍ରୟାସର ଏହି ଅନୁଭବ ସମ୍ଭବ ହୋଇ ପାରିଥାଏ ।
ସେ କହିଥିଲେ ଯେ, ଗତ କିଛି ମାସ ମଧ୍ୟରେ ଲକ୍ଷ ଲକ୍ଷ ପଦବୀ ପାଇଁ ଚୟନ ପ୍ରକ୍ରିୟା ସମ୍ପୂର୍ଣ୍ଣ ହେବା ଏବଂ ନିଯୁକ୍ତି ପତ୍ର ପ୍ରଦାନ କରାଯିବା ଗତ ୭ – ୮ ବର୍ଷ ମଧ୍ୟରେ ସରକାରୀ ବ୍ୟବସ୍ଥା କ୍ଷେତ୍ରରେ ହୋଇଥିବା ପରିବର୍ତ୍ତନର ସୂଚକ ଅଟେ । ସେ କହିଥିଲେ, “ଆଜି କାର୍ଯ୍ୟ ସଂସ୍କୃତି ବଦଳିବାରେ ଲାଗିଛି । ସେ ଆହୁରି ମଧ୍ୟ କହିଥିଲେ ଯେ, “ ଆମର କର୍ମଯୋଗୀ ମାନଙ୍କର ଉଦ୍ୟମ ଯୋଗୁଁ ସରକାରୀ ବିଭାଗ ଗୁଡିକର ଦକ୍ଷତା ବୃଦ୍ଧି ପାଇଛି । ସେ ମନେ ପକାଇ ଥିଲେ ଯେ, ପୂର୍ବରୁ ସରକାରୀ ଚାକିରି ପାଇଁ ଆବେଦନ କରିବା କିଭଳି ଏକ କଷ୍ଟଦାୟକ ପ୍ରକ୍ରିୟା ଥିଲା ଏବଂ ଚୟନ କ୍ଷେତ୍ରରେ ବ୍ୟାପକ ପକ୍ଷପାତିତା ଏବଂ ଦୁର୍ନୀତି ବିସ୍ତାର ଲାଭ କରିଥିଲା । ସେ କହିଥିଲେ ଯେ, ତାଙ୍କ ସରକାରର ପ୍ରାରମ୍ଭିକ ବର୍ଷ ଗୁଡିକରେ ସ୍ୱ – ପ୍ରମାଣପତ୍ର ଏବଂ କେନ୍ଦ୍ର ସରକାରଙ୍କ ଗ୍ରୁପ୍ ସି’ ଏବଂ ଗ୍ରୁପ୍ ଡି’ ପଦ ଗୁଡିକ ପାଇଁ ସାକ୍ଷାତକାରକୁ ଉଚ୍ଛେଦ କରିବା ଭଳି ପଦକ୍ଷେପ ଯୁବକ ମାନଙ୍କୁ ନିଯୁକ୍ତି କ୍ଷେତ୍ରରେ ସାହାଯ୍ୟ କରିଛି ।
ଆଜି, ଭାରତ ବିଶ୍ୱର ପଂଚମ ବୃହତ୍ତମ ଅର୍ଥନୀତି ହୋଇ ପାରିଛି । ଗତ ୮ ବର୍ଷ ମଧ୍ୟରେ କେନ୍ଦ୍ର ସରକାରଙ୍କ ପକ୍ଷରୁ କରା ଯାଇଥିବା ସଂସ୍କାର ଗୁଡିକ ଯୋଗୁଁ ଏହି ସଫଳତା ହାସଲ କରା ଯାଇଛି । ପ୍ରଧାନମନ୍ତ୍ରୀ ଦର୍ଶାଇ ଥିଲେ ଯେ , ଗତ ୭ – ୮ ବର୍ଷ ମଧ୍ୟରେ ଆମେ ଅର୍ଥନୀତି କ୍ଷେତ୍ରରେ ଦଶମରୁ ପଂଚମ ସ୍ଥାନକୁ ଉଠିଛେ । ଦେଶ ସମ୍ମୁଖୀନ ହେଉଥିବା ଅର୍ଥନୈତିକ ଆହ୍ୱାନର ବ୍ୟାପକତାକୁ ସ୍ୱୀକାର କରିବା ସହିତ ପ୍ରଧାନମନ୍ତ୍ରୀ କହିଥିଲେ ଯେ, ନକାରାତ୍ମକ ପ୍ରଭାବକୁ ଭାରତ ବହୁ ପରିମାଣରେ ନିୟନ୍ତ୍ରିତ କରିବାରେ ସଫଳ ହୋଇ ପାରିବ । ସେ କହିଥିଲେ ଯେ, “ଏହା ଏହି କାରଣରୁ ସମ୍ଭବ ହୋଇ ପାରିଛି, କାରଣ ଗତ ୮ ବର୍ଷ ମଧ୍ୟରେ ଆମେ ଦେଶର ଅର୍ଥ ବ୍ୟବସ୍ଥାର ସେହି ଦୁର୍ବଳତା, ଯାହା ପ୍ରତିବନ୍ଧକ ସୃଷ୍ଟି କରିଛି, ସେଗୁଡିକରୁ ମୁକ୍ତି ପାଇଛୁ ।
କୃଷି, ବେସରକାରୀ କ୍ଷେତ୍ର ଏବଂ ଏମ୍ଏସ୍ଏମ୍ଇ ପରି ଅଧିକ ନିଯୁକ୍ତି ସୁଯୋଗ ରହିଥିବା କ୍ଷେତ୍ର ଉପରେ ଗୁରୁତ୍ୱ ଦେଇ ପ୍ରଧାନମନ୍ତ୍ରୀ ଭାରତର ଯୁବକ ମାନଙ୍କର ଉଜ୍ଜ୍ୱଳ ଭବିଷ୍ୟତ ପାଇଁ ସେମାନଙ୍କର ଦକ୍ଷତା ବୃଦ୍ଧି ଉପରେ ଗୁରୁତ୍ୱାରୋପ କରିଥିଲେ । “ଆଜି ଆମେ ଯୁବକ ମାନଙ୍କର ଦକ୍ଷତା ବିକାଶ ଉପରେ ଅଧିକ ଗୁରୁତ୍ୱ ପ୍ରଦାନ କରୁଛୁ । ପ୍ରଧାନମନ୍ତ୍ରୀ କୌଶଳ ବିକାଶ ଯୋଜନା ଅଧୀନରେ, ଦେଶର ବିଭିନ୍ନ ଶିଳ୍ପ ସଂସ୍ଥାର ଆବଶ୍ୟକତା ଅନୁଯାୟୀ ଯୁବକ ମାନଙ୍କୁ ତାଲିମ୍ ଦେବା ପାଇଁ ଏକ ବିଶାଳ ଅଭିଯାନ ଚାଲିଛି ବୋଲି ସେ କହିଥିଲେ । ସ୍କିଲ୍ ଇଣ୍ଡିଆ ଅଭିଯାନ ଅଧୀନରେ ୧.୨୫ କୋଟି ଯୁବକଙ୍କୁ ତାଲିମ ପ୍ରଦାନ କରା ଯାଇଛି । ସାରା ଦେଶରେ କୌଶଳ ବିକାଶ କେନ୍ଦ୍ର ଏବଂ ଶହ ଶହ ଉଚ୍ଚଶିକ୍ଷା ପ୍ରତିଷ୍ଠାନ ଖୋଲା ଯାଇଛି ବୋଲି ସେ ସୂଚନା ଦେଇଥିଲେ । ପ୍ରଧାନମନ୍ତ୍ରୀ ଏହା ମଧ୍ୟ କହିଥିଲେ ଯେ ଡ୍ରୋନ୍ ନୀତିରେ ଉଦାରୀକରଣ ହେବା ସହିତ, ସ୍ପେସ୍ ପଲିସି ଖୋଲିବା ଏବଂ ମୁଦ୍ରା ଯୋଜନା ଅଧୀନରେ ୨୦ଲକ୍ଷ କୋଟି ଟଙ୍କାର ଋଣ ପ୍ରଦାନ ଭଳି ପଦକ୍ଷେପ ଏହି ପ୍ରକ୍ରିୟା ଗୁଡିକୁ ଆହୁରି ଆଗକୁ ନେଇଛି । ସେ କହିଥିଲେ ଯେ, “ଏତେ ବଡ ଆକାରରେ ଆତ୍ମ ନିଯୁକ୍ତି କାର୍ଯ୍ୟକ୍ରମ ପୂର୍ବରୁ ଦେଶରେ କେବେ ବି କାର୍ଯ୍ୟକାରୀ ହୋଇ ନଥିଲା ।”
ସେ ତାଙ୍କ ବକ୍ତବ୍ୟକୁ ଜାରି ରଖି କହିଥିଲେ ଯେ, ସ୍ୱୟଂ ସହାୟକ ଗୋଷ୍ଠୀ ବ୍ୟତୀତ ଖଦି ଏବଂ ଗ୍ରାମୀଣ ଉଦ୍ୟୋଗ ଗ୍ରାମ ଗୁଡିକରେ ରୋଜଗାର ସୃଷ୍ଟିର ପ୍ରମୁଖ ଉଦାହରଣ । ଦେଶରେ ପ୍ରଥମ ଥର ପାଇଁ, ଖଦି ଏବଂ ଗ୍ରାମୀଣ ଉଦ୍ୟୋଗ ଗୁଡିକର ସମୁଦାୟ ମୂଲ୍ୟ ୪ଲକ୍ଷ କୋଟି ଟଙ୍କା ଅତିକ୍ରମ କରିଛି ଏବଂ ଖଦି ଏବଂ ଗ୍ରାମୀଣ ଉଦ୍ୟୋଗ ଗୁଡିକରେ ପ୍ରାୟ ୪କୋଟିରୁ ଅଧିକ ନିଯୁକ୍ତି ସୁଯୋଗ ସୃଷ୍ଟି ହୋଇଛି । ସେ କହିଥିଲେ ଯେ, “ଏଥିରେ ଆମର ବହୁ ସଂଖ୍ୟକ ଭଉଣୀ ମାନଙ୍କର ଏକ ବଡ଼ ଅବଦାନ ରହିଛି” ।
ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ ଯେ, ଷ୍ଟାଟ – ଅପ୍ ଇଣ୍ଡିଆ ଅଭିଯାନ ସମଗ୍ର ବିଶ୍ୱରେ ଦେଶର ଯୁବପିଢ଼ିଙ୍କ ସାମର୍ଥ୍ୟ ପ୍ରତିଷ୍ଠା କରିଛି । ସେହିଭଳି, ମହାମାରୀ ସମୟରେ ପ୍ରାୟ ୧.୫ କୋଟି ଚାକିରିକୁ ସୁରକ୍ଷା ଦେଇ ଏମ୍ଏସ୍ଏମ୍ଇ ଗୁଡ଼ିକୁ ଏକ ବଡ଼ ଉପାୟରେ ସମର୍ଥନ କରା ଯାଇଥିଲା । ସେ ଆହୁରି ମଧ୍ୟ କହିଥିଲେ ଯେ, ଏମ୍ଜିଏନ୍ଆର୍ଇଜିଏ ଦେଶରେ ୭ କୋଟି ଲୋକ ମାନଙ୍କୁ ନିଯୁକ୍ତି ପ୍ରଦାନ କରିଥାଏ ।
ଏକ ବିଂଶ ଶତାବ୍ଦୀରେ ଦେଶ ପାଇଁ ସବୁଠାରୁ ମହତ୍ୱାକାଂକ୍ଷୀ ପ୍ରକଳ୍ପ ହେଉଛି ‘ମେକ୍ ଇନ୍ ଇଣ୍ଡିଆ’ ଏବଂ ‘ଆତ୍ମନିର୍ଭର ଭାରତ’ । ଆଜି ଦେଶ ବହୁ କ୍ଷେତ୍ରରେ ଆଗକୁ ବଢ଼ୁଥିବା ଆମଦାନୀକାରୀ ହେବା ସହିତ ଏକ ବୃହତ ରପ୍ତାନିକାରୀ ହେବାକୁ ଯାଉଛି । ଏପରି ଅନେକ କ୍ଷେତ୍ର ଅଛି ଯେଉଁଥିରେ ଭାରତ ଆଜି ଏକ ବିଶ୍ୱ ସ୍ତରୀୟ କେନ୍ଦ୍ର ହେବା ଦିଗରେ ଦ୍ରୁତ ଗତିରେ ଆଗେଇ ଚାଲିଛି । ସେ କହିଥିଲେ ଯେ , ଦେଶର ରେକର୍ଡ ଭାଙ୍ଗୁଥିବା ରପ୍ତାନୀ ମଧ୍ୟ ନିଯୁକ୍ତି କ୍ଷେତ୍ରରେ ଅଭିବୃଦ୍ଧିକୁ ସୂଚିତ କରୁଛି ।
ସେ କହିଥିଲେ ଯେ, “ଉତ୍ପାଦନ ଏବଂ ପର୍ଯ୍ୟଟନ କ୍ଷେତ୍ରରେ ସରକାର ବ୍ୟାପକ ଭାବରେ କାର୍ଯ୍ୟ କରୁଛନ୍ତି, ଏବଂ ଉଭୟ କ୍ଷେତ୍ରରେ ନିଯୁକ୍ତିର ଅନେକ ସମ୍ଭାବନା ରହିଛି ।’ ସମଗ୍ର ବିଶ୍ୱର ଅନେକ କମ୍ପାନୀ ଭାରତ ଆସିବା, ସେମାନଙ୍କ କାରଖାନା ସ୍ଥାପନ କରିବା ଏବଂ ସାରା ବିଶ୍ୱର ଚାହିଦା ପୂରଣ କରିବା ପାଇଁ ପ୍ରକ୍ରିୟା ଗୁଡିକୁ ମଧ୍ୟ ସରଳୀକୃତ କରା ଯାଉଛି । ଉତ୍ପାଦନ ଭିତ୍ତିରେ ପ୍ରୋତ୍ସାହନ ପ୍ରଦାନ କରିବା ପାଇଁ ସରକାର ମଧ୍ୟ ପିଏଲ୍ଆଇ ଯୋଜନା ଆରମ୍ଭ କରିଛନ୍ତି । ଅଧିକ ଉତ୍ପାଦନ , ଅଧିକ ପ୍ରୋତ୍ସାହନ, ତାହା ହେଉଛି ଭାରତର ନୀତି । ଏହାର ଫଳାଫଳ ଆଜି ଅନେକ କ୍ଷେତ୍ରରେ ଦେଖା ଯାଉଛି । ବିଗତ ବର୍ଷ ଗୁଡିକରେ ଆସିଥିବା ଇପିଏଫ୍ଓ ତଥ୍ୟ ମଧ୍ୟ ଏହା ଦର୍ଶାଏ ଯେ ରୋଜଗାର ସମ୍ବନ୍ଧରେ ସରକାରଙ୍କ ନୀତି ଅନେକ କ୍ଷେତ୍ରରେ ପରିସ୍ଥିତିରେ ଉନ୍ନତି ଆଣିଛି । ସେ ଦର୍ଶାଇଥିଲେ ଯେ ଦୁଇ ଦିନ ପୂର୍ବେ ଆସିଥିବା ତଥ୍ୟ ଅନୁଯାୟୀ ଚଳିତ ବର୍ଷ ଅଗଷ୍ଟ ମାସରେ ପ୍ରାୟ ୧୭ ଲକ୍ଷ ଲୋକ ଇପିଏଫ୍ଓରେ ଯୋଗ ଦେଇଥିଲେ ଏବଂ ବର୍ତ୍ତମାନ ସେମାନେ ଦେଶର ଆନୁଷ୍ଠାନିକ ଅର୍ଥନୀତିର ଏକ ଅଂଶ ହୋଇ ପାରିଛନ୍ତି । ସେ ସୂଚନା ଦେଇଥିଲେ ଯେ ପ୍ରାୟ ୮ ଲକ୍ଷ ଲୋକ ୧୮ ରୁ ୨୫ ବର୍ଷ ବୟସ ବର୍ଗ ମଧ୍ୟରେ ଅଛନ୍ତି ।
ଭିତ୍ତିଭୂମି ସୃଷ୍ଟି ମାଧ୍ୟମରେ ରୋଜଗାରର ବିଭିନ୍ନ ଦିଗ ଉପରେ ପ୍ରଧାନମନ୍ତ୍ରୀ ମଧ୍ୟ ଆଲୋକପାତ କରିଥିଲେ । ସେ ସୂଚନା ଦେଇଥିଲେ ଯେ, ଗତ ଆଠ ବର୍ଷ ମଧ୍ୟରେ ସାରା ଦେଶରେ ହଜାର ହଜାର କିଲୋମିଟର ଦୀର୍ଘ ଜାତୀୟ ରାଜପଥ ନିର୍ମାଣ କରା ଯାଇଛି ଏବଂ ରେଳ ଲାଇନ୍ର ପରିମାଣ ଦ୍ୱିଗୁଣିତ ହୋଇଛି, ଗେଜ୍ ରୂପାନ୍ତର ଏବଂ ବିଦ୍ୟୁତିକରଣ ଉପରେ କ୍ରମାଗତ ଭାବରେ କାର୍ଯ୍ୟ ଚାଲିଛି । ସେ ଆହୁରି ମଧ୍ୟ କହିଥିଲେ ଯେ ଦେଶରେ ନୂତନ ବିମାନ ବନ୍ଦର ନିର୍ମାଣ କରା ଯାଉଛି, ରେଳ ଷ୍ଟେସନ ଗୁଡିକୁ ଆଧୁନିକୀକରଣ କରା ଯାଉଛି ଏବଂ ନୂତନ ଜଳପଥ ନିର୍ମାଣ କରା ଯାଉଛି । ଶ୍ରୀ ମୋଦୀ ଆହୁରି ମଧ୍ୟ କହିଥିଲେ ଯେ, “ପ୍ରଧାନମନ୍ତ୍ରୀ ଆବାସ ଯୋଜନା ଅଧୀନରେ ତିନି କୋଟିରୁ ଅଧିକ ଗୃହ ମଧ୍ୟ ନିର୍ମାଣ କରା ଯାଇଛି ।
ପ୍ରଧାନମନ୍ତ୍ରୀ ସୂଚନା ଦେଇଥିଲେ ଯେ, ଦେଶରେ ଅଧିକରୁ ଅଧିକ ନିଯୁକ୍ତି ସୃଷ୍ଟି ପାଇଁ କେନ୍ଦ୍ର ସରକାର ଏକା ସାଙ୍ଗରେ ଏକାଧିକ କାର୍ଯ୍ୟ କରୁଛନ୍ତି । ଭିତ୍ତିଭୂମି ବାବଦରେ ଭାରତ ସରକାର ଏକ ଶହ ଲକ୍ଷ କୋଟି ଟଙ୍କାରୁ ଅଧିକ ଲକ୍ଷ୍ୟ ନେଇ କାର୍ଯ୍ୟ କରୁଥିବା ସମ୍ପର୍କରେ ପ୍ରଧାନମନ୍ତ୍ରୀ ସୂଚନା ଦେଇଥିଲେ । ସେ କହିଥିଲେ ଯେ ଆଂଚଳିକ ସ୍ତରରେ ଯୁବକ ମାନଙ୍କ ପାଇଁ ଲକ୍ଷ ଲକ୍ଷ ନିଯୁକ୍ତି ସୁଯୋଗ ସୃଷ୍ଟି କରି ବିକାଶମୂଳକ କାର୍ଯ୍ୟ ଏକ ବୃହତ ସ୍ତରରେ ଚାଲିଛି । ପ୍ରଧାନମନ୍ତ୍ରୀ ବିଶ୍ୱାସ , ଆଧ୍ୟାତ୍ମିକତା ଏବଂ ଐତିହାସିକ ଭାବରେ ଗୁରୁତ୍ୱପୂର୍ଣ୍ଣ ସ୍ଥାନ ଗୁଡିକର ଉଦାହରଣ ଦେଇଥିଲେ, ଯାହା ଦେଶରେ ଏବେ ବିକଶିତ ହେଉଛି । ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ ଯେ ଆଧୁନିକ ଭିତ୍ତିଭୂମି ପାଇଁ କରା ଯାଉଥିବା ଏହି ବିକାଶମୂଳକ କାର୍ଯ୍ୟ ଗୁଡ଼ିକ ପର୍ଯ୍ୟଟନ କ୍ଷେତ୍ରକୁ ନୂତନ ଶକ୍ତି ପ୍ରଦାନ କରୁଛି ଏବଂ ଦୁର୍ଗମ ଅଂଚଳରେ ଯୁବକ ମାନଙ୍କ ପାଇଁ ରୋଜଗାରର ସୁଯୋଗ ମଧ୍ୟ ସୃଷ୍ଟି କରୁଛି ।
ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ ଯେ , “ଆମେ ଭାରତର ଯୁବକ ମାନଙ୍କୁ ଆମ ଦେଶର ସବୁଠାରୁ ବଡ଼ ଶକ୍ତି ବୋଲି ବିବେଚନା କରୁଛୁ” । ଆଜାଦିର ଅମୃତ କାଳ ସମୟରେ ଏକ ବିକଶିତ ଭାରତ ନିର୍ମାଣ କରିବା କ୍ଷେତ୍ରରେ ସେମାନେ ହେଉଛନ୍ତି ପ୍ରେରଣା ଶକ୍ତି । ପ୍ରଧାନମନ୍ତ୍ରୀ ନୂତନ ଭାବେ ନିଯୁକ୍ତି ପାଇଥିବା ବ୍ୟକ୍ତି ମାନଙ୍କୁ ଅନୁରୋଧ କରିଥିଲେ ଯେ ସେମାନେ କାର୍ଯ୍ୟାଳୟ ଦ୍ୱାର ଦେଇ ଗଲାବେଳେ ସେମାନଙ୍କର ‘କର୍ତ୍ତବ୍ୟ ପଥ’ କୁ ସବୁବେଳେ ମନେ ରଖିବା ଆବଶ୍ୟକ । ପ୍ରଧାନମନ୍ତ୍ରୀ କହିଥିଲେ ଯେ “ଆପଣ ଦେଶର ନାଗରିକ ମାନଙ୍କର ସେବା ପାଇଁ ନିଯୁକ୍ତ ହେଉଛନ୍ତି । ଏକ ବିଂଶ ଶତାବ୍ଦୀରେ ଭାରତରେ ସରକାରୀ ଚାକିରି କେବଳ ସୁବିଧା ପାଇବା ପାଇଁ ନୁହେଁ, ବରଂ ଦେଶର ପ୍ରତ୍ୟେକ କୋଣ ଅନୁକୋଣରେ ରହୁଥିବା ଲୋକ ମାନଙ୍କର ସେବା କରିବା ପାଇଁ ଏକ ପ୍ରତିବଦ୍ଧତା ଏବଂ ସୁବର୍ଣ୍ଣ ସୁଯୋଗ ବୋଲି ଉଲ୍ଲେଖ କରି ପ୍ରଧାନମନ୍ତ୍ରୀ ତାଙ୍କ ବକ୍ତବ୍ୟ ଶେଷ କରିଥିଲେ ।
ପୃଷ୍ଠଭୂମି
ଯୁବପିଢ଼ିଙ୍କୁ ନିଯୁକ୍ତି ସୁଯୋଗ ପ୍ରଦାନ କରିବା ତଥା ନାଗରିକ ମାନଙ୍କର କଲ୍ୟାଣ ନିମନ୍ତେ ପ୍ରଧାନମନ୍ତ୍ରୀ କରିଥିବା ନିରନ୍ତର ପ୍ରତିବଦ୍ଧତା ପୂରଣ ଦିଗରେ ଆଜିର ଏହି କାର୍ଯ୍ୟ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ହେବ । ପ୍ରଧାନମନ୍ତ୍ରୀଙ୍କ ନିର୍ଦ୍ଦେଶ ଅନୁଯାୟୀ , ସମସ୍ତ ମନ୍ତ୍ରଣାଳୟ ଏବଂ ବିଭାଗ ମିଶନ ମୋଡରେ ଅନୁମୋଦିତ ପଦବୀ ଗୁଡିକ ନିମନ୍ତେ ପୂର୍ବରୁ ଖାଲି ରହିଥିବା ପଦବୀ ପୂରଣ ଦିଗରେ କାର୍ଯ୍ୟ କରୁଛନ୍ତି ।
ଦେଶର ବିଭିନ୍ନ ସ୍ଥାନରୁ ମନୋନୀତ ହୋଇଥିବା ଏହି ନୂତନ ନିଯୁକ୍ତ ବ୍ୟକ୍ତି ମାନେ ଭାରତ ସରକାରଙ୍କର ୩୮ ଟି ମନ୍ତ୍ରଣାଳୟ / ବିଭାଗରେ ଯୋଗ ଦେବେ । ନିଯୁକ୍ତ ବ୍ୟକ୍ତିମାନେ ସରକାରୀ ସେବାରେ ବିଭିନ୍ନ ସ୍ତର, ଯଥା ଗ୍ରୁପ୍ – ଏ, ଗ୍ରୁପ୍ – ବି (ଗେଜେଟେଡ୍), ଗ୍ରୁପ୍ – ବି (ଅଣ-ଗେଜେଟେଡ୍) ଏବଂ ଗ୍ରୁପ୍ – ସି ଇତ୍ୟାଦିରେ ଯୋଗ ଦେବେ । ଯେଉଁ ପଦବୀ ଗୁଡିକରେ ନିଯୁକ୍ତି ଦିଆ ଯାଉଛି ସେଥିରେ କେନ୍ଦ୍ରୀୟ ସଶସ୍ତ୍ର ବାହିନୀ କର୍ମଚାରୀ, ସବ୍ ଇନ୍ସପେକ୍ଟର, କନଷ୍ଟେବଲ୍, ଏଲ୍ଡିସି, ଷ୍ଟେନୋ, ପିଏ, ଇନ୍କମ୍ ଟ୍ୟାକ୍ସ ଇନ୍ସପେକ୍ଟର, ଏବଂ ଏମ୍ଟିଏସ୍ ଇତ୍ୟାଦି ଅନ୍ତର୍ଭୁକ୍ତ ।
ଏହି ନିଯୁକ୍ତି ଗୁଡିକ ମିଶନ ମୋଡରେ ମନ୍ତ୍ରଣାଳୟ ଏବଂ ବିଭାଗ ଗୁଡିକ ଦ୍ୱାରା କରା ଯାଉଛି କିମ୍ବା ୟୁପିଏସ୍ସି, ଏସ୍ଏସ୍ସି ଏବଂ ରେଳ ନିଯୁକ୍ତି ବୋର୍ଡ ଭଳି ନିଯୁକ୍ତି ଏଜେନ୍ସି ମାଧ୍ୟମରେ କରା ଯାଉଛି । ଶୀଘ୍ର ନିଯୁକ୍ତି ନିମନ୍ତେ ଚୟନ ପ୍ରକ୍ରିୟାକୁ ସରଳୀକୃତ କରା ଯାଇଛି ଏବଂ ପ୍ରଯୁକ୍ତି ଦୃଷ୍ଟିକୋଣରୁ ସକ୍ଷମ କରା ଯାଇଛି ।
